IDHAA YA KISWAHILI | DW
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
Matangazo
Matangazo
Matangazo

Habari

Habari za Ulimwengu | 26.03.2021 | 15:00

Magufuli azikwa nyumbani kwake Chato

Hatimaye hayati John Pombe Magufuli Rais wa awamu ya tano wa Tanzania amezikwa katika makazi yake eneo la Mlimani Chato.Shughuli ya maziko iliyofanyika katika makaburi ya familia ya marehemu ilihusisha watu wachache wakiwemo viongozi wa serikali, wastaafu na familia yake.Maelfu ya Watanzania wameshuhudia tukio hilo moja kwa moja kupitia vyombo vya habari vya ndani na nje ya Tanzania.Rais wa Tanzania Samia Suluhu Hassan amesema, "Tunashkuru sana katika uongozi wake tumejifunza mengi, tumepikwa vizuri, tumeivaa haswa na tumeuiva sawa sawa. Tunapokwenda kumpumzisha tunaweza kusema bila kigugumizi, kuwa tuko tayari kuendeleza kazi yake nzuri kwa nguvu, kasi na ari ile ile."Magufuli alifariki Machi 17 mwaka huu katika hospitali ya Mzena mjini Dar es Salaam kwa matatizo ya moyo.

Ujerumani yaonya kuwa wimbi la tatu la virusi vya Corona huenda likawa baya zaidi

Mkuu wa taasisi ya Robert Koch inayoshughulikia magonjwa ya kuambukiza nchini Ujerumani ameonya kuwa huenda wimbi la tatu la virusi vya Corona likawa baya zaidi kwa nchi hiyo.Lothar Wieler amesema pia sio ajabu kwa nchi hiyo kurekodi maambukizi mapya 100,000 kwa siku na kuwahimiza watu kusalia majumbani wakati wa sikukuu ya Pasaka.Idadi ya maambukizo mapya nchini Ujerumani imeongezeka katika wiki za hivi karibuni, maambukizo hayo mapya yakisababishwa na aina mpya ya kirusi cha Corona kinachosambaa kwa kasi pamoja na kulegezwa kwa baadhi ya vizuizi.Waziri wa afya Jens Spahn ameonya kuwa mfumo wa afya wa Ujerumani huenda ukalemewa kufikia mwezi Aprili.Idadi ya maambukizo mapya ya ugonjwa wa Covid-19 imeongezeka kwa visa 21, 573 kufikia leo Ijumaa huku idadi ya watu waliokufa kwa ugonjwa huo ikiongezeka kwa 183.

Wanaharakati watoa wito wa maandamano zaidi Myanmar

Wanaharakati nchini Myanmar wametoa wito kufanyike maandamano makubwa zaidi wikendi hii wakati jeshi litakapokuwa linaadhimisha siku ya Wanajeshi nchini humo, baada ya shambulio la bomu katika makao makuu ya chama cha kiongozi aliyepinduliwa Aung San Suu Kyi.Kabla ya alfajiri, ofisi za chama cha Aung Suu Kyi cha National League for Demorcary (NLD) zilishambuliwa japo kulikuwa na uharibifu mdogo.Shambulio hilo limetokea siku moja tu kabla ya maadhimisho ya siku ya vikosi vya jeshi, wakati wanajeshi watakapopiga gwaride na kuonyesha uwezo wao.Wakati huo huo, afisa mwandamizi wa magereza ameliambia shirika la habari la AFP kuwa zaidi ya watu 300 waliokuwa wamewekwa kizuizini kufuatia maandamano wameachiliwa huru.Kuachiliwa kwa watu hao kunatokea siku chache tu baada ya jeshi kuwaachiliwa huru watu wengine zaidi ya 600 waliokuwa wamekamatwa wakati wa oparasheni ya kijeshi dhidi ya waandamanaji.Nchi hiyo imetumbukia kwenye machafuko baada ya mapinduzi ya kijeshi mnamo Februari mosi, yaliyomng'oa madarakani Aung San Suu Kyi, hatua iliyochochea maandamano ya kutaka kurejeshwa kwa utawala wa kiraia.

Urusi yakanusha kutumia chanjo kuimarisha ushawishi wake duniani

Ikulu ya Kremlin imekanusha kuwa Urusi na China zinatumia chanjo dhidi ya ugonjwa wa Covid-19 kama njia za kupanua ushawishi wao kijiografia, baada ya shutma kuwa nchi hizo zinatumia chanjo kuimarisha ushawishi wao katika sehemu nyengine duniani. Msemaji wa Kremlin Dmitry Peskov amewaambia waandishi wa habari kuwa hakubaliani na madai kuwa Urusi na China zinaanzisha vita vya aina fulani duniani, na kwamba nchi hizo mbili hazitumii suala la chanjo kama njia ya kupanua ushawishi wao.Mapema Ijumaa, Rais wa Ufaransa Emmanuel Macron alidai kuwa nchi yake inakabiliwa na "aina mpya ya vita vya ulimwengu" na kunyoosha kidole cha lawama kwa Urusi na China kwa kutumia suala la chanjo kuimarisha ushawishi wao duniani.Hata hivyo, Urusi na China zimeshtumu nchi za Magharibi kwa kujilimbikizia akiba nyingi za chanjo badala ya kuzisambaza kwa mataifa maskini.

Ethiopia yasema Eritrea imekubali kuondoa wanajeshi wake Tigray

Waziri Mkuu wa Ethiopia amesema leo Ijumaa kuwa Eritrea imekubali kuondoa wanajeshi wake kutoka jimbo la Tigray, sehemu ambayo mashahidi wamesema wanajeshi hao wamepora, kuua na kubaka raia. Taarifa iliyotolewa na ofisi ya waziri mkuu Abiy Ahmed inakuja kufuatia shinikizo kubwa kutoka kwa Marekani na viongozi wengine duniani kuitaka Ethiopia kushughulikia mgogoro katika jimbo la Tigray.Hayo ni baada ya ziara ya waziri mkuu Abiy Ahmed nchini Eritrea, ambapo ametangaza kuwa kuanzia sasa wanajeshi wa Ethiopia watalinda maeneo ya mpakani.Wiki iliyopita, Abiy alikiri uwepo wa vikosi vya usalama vya Eritrea, ambao wanatajwa kuwa wapinzani wa muda mrefu wa viongozi wa Tigray, waliokuwa na ushawishi mkubwa katika serikali ya Ethiopia.Hata hivyo, Eritrea haijasema lolote juu ya suala hilo.

Macron kupewa ripoti juu ya jukumu la Ufaransa katika mauaji ya kimbari ya Rwanda

Tume ya uchunguzi itawasilisha ripoti yao leo Ijumaa kwa Rais wa Ufaransa Emmanuel Macron baada ya miaka miwili ya kuifanyia kazi ripoti hiyo ya uchunguzi juu ya jukumu la Ufaransa katika mauaji ya kimbari ya Rwanda ya 1994. Vyanzo viwili vinavyoifahamu ripoti hiyo na ambavyo hakikutaka kutajwa, vimeliambia shirika la habari la AFP kuwa ripoti hiyo itawasilishwa kwa Macron leo mchana.Kumekuwa na madai kuwa Ufaransa, wakati huo ikitawaliwa na Rais Francois Mitterrand, haikufanya vya kutosha kuzuia mauaji ya kiasi watu 800,000 wengi wao kutoka kabila la walio wachache la Watutsi, na kwamba Ufaransa yenyewe pia ilihusika kwa kiasi fulani.Suala hilo limeharibu uhusiano kati ya Ufaransa na Rwanda chini ya Rais Paul Kagame, Mtutsi aliyeiongoza nchi hiyo ya ukanda wa Afrika Mashariki baada ya mauaji hayo ya halaiki.Macron aliagiza kuanzishwa kwa tume hiyo mnamo Mei mwaka 2019 ili kuchunguza jukumu la Ufaransa nchini Rwanda kati ya mwaka 1990 hadi 1994 kupitia utafiti wa kumbukumbu.

Marekani yatoa fedha kwa Palestina kuisaidia kupambana na Covid-19

Marekani imesema itatoa msaada wa dola milioni 15 kwa jamii za Wapalestina zilizoko hatarini katika ukingo wa Magharibi na ukanda wa Gaza ili kuzisaidia kupambana na janga la ugonjwa wa Covid-19, hatua hiyo ikiwa tofauti kabisa na utawala wa Donald Trump uliokata karibia misaada yote kwa Wapalestina.Balozi wa Marekani katika Umoja wa Mataifa Linda Thomas-Greenfield alitoa tangazo hilo katika mkutano wa kila mwezi wa baraza la usalama la Umoja wa Mataifa, akisema fedha hizo zitasaidia katika mapambano dhidi ya janga hilo la ulimwengu pamoja na usaidizi wa huduma za afya.Chini ya utawala wa Donald Trump, Marekani ilitoa msaada mkubwa kwa Israel na hata kuitambua Jerusalem kama mji mkuu wataifa hilo la kiyahudi, na kuuhamisha ubalozi wa Marekani kutoka Tel-Aviv, pamoja na kuvunja uhusiano na hata kupunguza misaada ya kifedha kwa Wapalestina.Hata hivyo, mara tu baada ya Joe Biden kuingia mamlakani mnamo Januari 20, aliahidi kurejesha uhusiano na Wapalestina pamoja na kuwapelekea misaada.

Mshukiwa wa mauji ya Colorado afikishwa kortini kwa mara ya kwanza

Mshukiwa katika mauaji yaliyotokea katika duka kubwa la bidhaa la Colorado, nchini Marekani amefikishwa kortini kwa mara ya kwanza, huku mawakili wake wakiitaka mahakama kumruhusu mshukiwa huyo afanyiwe vipimo vya kiakili kabla ya kesi dhidi yake kuendelea.Ahmad Al Aliwi Alissa, mwenye umri wa miaka 21 hakuzungumza wakati alipofikishwa kortini, japo aliitikia "Ndio" kwa swali aliloulizwa na jaji, aliyemsomea mashtaka ya mauaji katika shambulio lililowaua watu 10 akiwemo afisa mmoja wa polisi.Alissa pia ameshtakiwa kwa kosa la jaribio la mauaji kwa madai ya kumpiga risasi afisa mwengine wa polisi ambaye alinusurika bila ya majeraha katika tukio hilo.Mwanasheria katika wilaya ya Boulder amesema mamlaka inapanga kumfungulia mshukiwa huyo mashtaka zaidi japo hakufafanua.Kikao cha kesi hiyo kitafanyika tena baada ya miezi miwili au mitatu ili kuzipa pande husika muda wa kukusanya ushahidi na pia kupata ripoti ya uchunguzi juu ya afya yake ya kiakili.

Matukio ya kisiasa

Matukio ya Afrika

Masuala ya jamii

Michezo

Habari kwa lugha ya Kiingereza

Redaktionsfoto Kisuaheli

Bonyeza hapa kupata Matangazo na ripoti zetu

Matangazo
Tazama vidio 01:05

Vidio zaidi

John Pombe Magufuli azikwa

John Pombe Magufuli azikwa

Meli kubwa yakwama katika mfereji wa Suez

Meli kubwa yakwama katika mfereji wa Suez

Wachambuzi na wakaazi waelezea matarajio yao katika utawala wa Rais Samia Suluhu Hassan

Wachambuzi na wakaazi waelezea matarajio yao katika utawala wa Rais Samia Suluhu Hassan

Samani na mapambo kutokana na matairi makuukuu

Samani na mapambo kutokana na matairi makuukuu

Kansela Angela Merkel alihutubia bunge kuhusu janga la Covid-19

Kansela Angela Merkel alihutubia bunge kuhusu janga la Covid-19

Wakazi wa Chato wa uaga mwili wa marehemu Magufuli

Wakazi wa Chato wa uaga mwili wa marehemu Magufuli